அல்லையூர் இணையத்தின் தைப்பொங்கல் சிறப்புக் கவிதை இணைப்பு-ஆக்கம் அல்லையூர் கவிஞர் பாலன் சேவியர் அவர்கள்!

அல்லையூர் இணையத்தின் தைப்பொங்கல் சிறப்புக் கவிதை இணைப்பு-ஆக்கம் அல்லையூர் கவிஞர் பாலன் சேவியர் அவர்கள்!

DSC00448

மங்களம் நிறையும் பொங்கல்

கங்குல் விலகிட கதிரவன் எழுந்தான்
கலைகள் பிறந்திட இசையில் நிறைந்திட
திங்கள் கதிரொளி தேனிசை பொழிந்திட
தீந்தமிழ் வளங்கள் கதிரொளி பொழிந்திட
மங்களம் பொங்கும் மரகதம் ஒளிவிட
மாணிக்க சம்பா நெல் பொலிந்திட
பொங்கல் மகிமையில் பூரித்து மனமெழ
பாரினில் உழவர் கரங்கள் பலம்பெற
எங்கும் உழவர் திருநாள் மகிழ்வு
எதிலும் பொங்கல் மகிமை நிறைவு

உழவர் கரங்கள் மகிமை பெற்றிட
உழுதுண்ணும் வாழ்வு மண்ணில் நிறைவுற
எழுச்சியில் மனிதம் தலை நிமிர்ந்திட
ஏதிலி வாழ்வு மண்விட்டு மறைந்திட
ஒழுக்கம் ஒப்புரவு மனதில் வளர்ந்திட
ஒத்திகை வாக்குறுதிகள் மாற்றமடைய
வழுவா நெறிகள் மண்ணில் மலர்ந்திட
வாழ்வில் இறைவா இரங்கியருள்வாய்

வேதங்கள் சொல்லும் வழிப்படி நடக்க
வாதுகள் வம்புகள் வரையடங்கி போயிட
அதர்மம் அழிந்து அறம் மேலோங்க
அன்பும் பண்பும் ஆழமாய் பொலிவுற

உதவாக் கொள்கைகள் மண்ணில் நீங்கிட
உலகில் நின்மதி வாழ்வு மலர்ந்திட
எதையும் தாங்கும் இதயமாய் வாழ்வோம்
எல்லா மனமும் மகிழ்வுற வாழ்வோம்
பொங்கல் மகிமை புத்துயிர் தரட்டும்
மங்களம் இறைவன் துணையில் வாழ்வோம்

ஆக்கம் – பாலன் சேவியர்;,
அல்லைப்பிட்டி

 

Leave a Reply